monumenta.ch > Hieronymus > sectio 21
Word Selection for Searching
Report an Error in this Sectio
Hieronymus, Commentarii, in Michaeam, 1, 1, 21
Et hoc faciam, quia desperata est plaga eius, id est, Samariae. Et idem peccatum, immo eadem poena peccati, quae evertit Samariam, veniet usque ad Iudam, et usque ad portam urbis meae Ierusalem. Ut enim Samaria subversa est ab Assyriis: ita Iuda et Ierusalem subvertentur a Chaldaeis. Quia vero Samariam, haereticorum semel intelleximus Ecclesiam, quae separata a Deo, populi facta est conciliabulum, ipse Dominus comminatur positurum se eam in pomorum custodiam, in agrum et in plantationem vineae.