monumenta.ch > Seneca Maior > sectio 9

Word Selection for Searching

Report an Error in this Sectio
Seneca Maior, Controversiae, 7, 5, 9
FUSCUS ait: destricta levi vulnere est cutis; non credas factum manu privigni, credas amatoris. PASSIENUS ait: sic leviter te vulneravit dextera illa, cui nec paries obstitit nec pater? VARIUS GEMINUS dixit: da ferrum testi meo: fortius feriet. CESTIUS dixit, cum descripsisset, quam leve vulnus esset: nocueras, inquit, mihi, si amicae tuae nocere potuisses. BRUTUS BRUTTEDIUS cotidiano verbo significanter usus est: rivalem, inquit, occidit, amicam sauciavit. HISPO ROMANIUS eiusdem generis rem dixit: ostende, noverca, ostende istud, quod amator tuus vellicavit. BASSUS SEPULLIUS dixit: maritum occidit, adulteram strinxit.