Beda Venerabilis Beda Venerabilis, In Lucae Evangelium Expositio, 3, 8, 135 Quam et ob facilitatem resuscitandi, iam mortuam fuisse negaverat. Delatum autem foras iuvenem, pluribus, ut reviviscere debeat, dictis corroborat, cum ait: Iuvenis, tibi dico, surge. Quatriduanus vero mortuus, ut longa prementis sepulcri claustra deponere posset, fremuit spiritu Iesus, turbavit seipsum, lacrymas fudit, rursum fremuit, ac magna voce clamavit: Lazare, veni foras. Et sic tandem, qui erat desperatus, discusso tenebrarum pondere, vitae lucique redditur.