Plinius Plinius, Naturalis Historia, 27, 114 {XCI} quocumque haec modo se habent, vis earum est spissare ac refrigerare. semine alvum solvunt, largius sumpto urinam cient, rheumatismos cohibent, qui si non fuere, non prosunt. stomachi fervori folia inponuntur, vesicae dolori inlinuntur et ignibus sacris. sucus et auribus purulentis instillatur et oculorum dolori. per se datur et in febris ante accessiones II cyathis, in tertianis quartanisque praecipue, item cholericis, dysentericis et in solutione stomachi.