Hrabanus Maurus Hrabanus Maurus, Martyrologium, 2, 16 XIV KAL. Sancti Onesimi apostoli, et in Cumis nativitas sanctae Iulianae virginis, quae tempore Maximiani imperatoris primo a suo patre Africano caesa et graviter cruciata, dein a praefecto Eulesio, quem sponsum habuerat, nuda virgis caesa, et a capillis suspensa, et plumbo soluto a capite perfusa, et rursum in carcerem recepta, ubi palam cum diabolo conflixit; et rursus evocata, rotarum tormenta, flammas ignium, ollam ferventem superavit, ac decollatione capitis martyrium consummavit, quae passa est quidem in Nicomedia, sed post paucum tempus, Deo disponente, in Campaniam translata.