Petrus Venerabilis Petrus Venerabilis, Epistulae, 6, 12, 9 Videor tangere arcam Dei, et eam manu praesumptuosa, ut quondam Oza bobus lascivientibus, sublevare. Sed non sum praesumptor, non sum, quantum ad hunc casum pertinet, dignus morte ut ille, quia securum me faciunt verba illius qui dixit: Si oculus tuus fuerit simplex, totum corpus tuum lucidum erit. Dicam ergo, nec iam ultra morabor. Audiat Pater aequo animo verba filii, nec in illis aliquid vafrum vel subdolum latere existimet.