Seneca Maior Seneca Maior, Controversiae, 7, 2, 14 ARGENTARIUS dixit: vocatus veni. post proscriptionem Antonius terribilior erat factus etiam suis. iussus sum Ciceronem occidere; quid facerem? non parere uno modo poteram, si me occidissem. hoc nec Cicero poterat. A parte accusatoris illo loco, quo Popillius venit, nemo non aliquid voluit novi dicere. LATRO ait: praecluserat fores, nemo ad proscriptum recipiebatur. Popillius ut venit, admissus est. CESTIUS dixit: ut renuntiatum est Ciceroni, ait: Popillio semper vaco. HISPANUS CORNELIUS fecit etiam querentem Ciceronem: Popilli, tam sero? ALBUCIUS ait: quid est, Popilli? ecquid tuto lateo? numquid mutandus est locus? Inepte SABIDIENUS PAULUS, qui induxit Ciceronem cum maxime (pro) Popillio orationem legentem; et MURREDIUS non est passus hanc controversiam transire sine aliqua stuporis sui nota. descripsit enim ferentem caput et manum Ciceronis Popillium et Publilianum dedit: Popilli, quanto aliter reus Ciceronis [et] tenebas manum! [est]