| CLIII De sancto Crisanto |
| 1 | Crisantus filius Polimii uiri illustrissimi dum fidem Christi edoctus esset et a patre ad ydola reuocari non posset, iussit eum pater in conclaui recludi et quinque puellas eidem ut earum seducatur blanditiis sociari. |
| 2 | Qui cum orasset deum ne a fera pessima carnali, scilicet concupiscentia, superaretur, continuo predicte puelle sompno oppresse nec potum nec cibum sumere poterant, sed educte exterius continuo hec sumebant. |
| 3 | Tunc Daria uirgo prudentissima dee Veste dicata rogatur ut ad Crisantum introeat et eum diis et patri restituat. |
| 4 | Qua ingressa et a Crisanto de pompa uestium reprehensa respondit se non propter pompam, sed ut diis et patri eum lucrifaceret sic indutam. |
| 5 | Cum iterum Crisantus eam reprehenderet cur pro diis illos coleret quos auctores ipsorum flagitiosos uiros et impudicas feminas affirmarent, respondit Daria philosophos per nomina hominum elementa sensisse. |
| 6 | Cui Crisantus: «Si unus terram ut deam ueneretur et alter ut rusticus aret, plus rustico quam ueneranti exhibere probatur, et de mari et aliis similiter». |
| 7 | Tunc Crisantus et Daria ab eo conuersa sancti spiritus copula uniti et carnale matrimonium simulantes ad Christum plurimos conuertebant. |
| 8 | Nam et Claudium tribunum qui prius eius tortor fuerat cum uxore ipsius et filiis et pluribus aliis militibus ad fidem conuerterunt. |
| 9 | Crisantus igitur iussu Numeriani in fetidissimum carcerem recluditur, sed fetor in odorem suauissimum commutatur. |
| 10 | Daria autem lupanari traditur, sed leo ab amphitheatro fugiens ostiarius lupanaris efficitur. |
| 11 | Mittitur igitur quidam ut uirginem corrumpat, sed a leone capitur et quasi innuens a sancta quid de captiuo fieri iubeat sciscitatur. |
| 12 | Que precepit ne eum lederet, sed ad se uenire permitteret. |
| 13 | Qui mox conuersus per urbem cucurrit et Dariam deam esse clamare cepit. |
| 14 | Mittuntur igitur uenatores ut leonem capiant, sed omnes a leone capiuntur et ante pedes uirginis ponuntur et ab ea conuertuntur. |
| 15 | Tunc prefectus copiosum ignem in introitu celle mitti iussit ut leo cum Daria comburatur. |
| 16 | Quod leo considerans timuit et rugiens a uirgine licentiam accepit ut nullum ledens quo uellet abiret. |
| 17 | Cum ergo prefectus Crisanto et Darie diuersa penarum supplicia irrogaret et nequaquam ledi ualerent, tandem inuiolati coniuges in foueam deponuntur et terra et lapidibus obruti Christo martyres consecrantur, tempore Cari Narbonensis episcopi qui cepit anno domini CCXXXV. Horum sollempnitas hic crebrius recolitur. |