13.
| 1 | « Agros etiam virginibus et ministris deficientium voluntate legatos fiscus retentat. |
| 2 | Oro vos, iustitiae sacerdotes, ut urbis vestrae sacris reddatur privata successio. |
| 3 | Dictent testamenta securi, et sciant sub principibus non avaris stabile esse, quod scripserint. |
| 4 | Delectet vos ista felicitas generis humani, coepit causae huius exemplum sollicitare morientes. |
| 5 | Ergo Romanae religiones sub Romana iura non pertinent? Quod nomen accipiet ablatio facultatum, quas nulla lex, nullus casus fecit caducas? Capiunt legata liberti, servis testamentorum iusta commoda non negantur: tantum nobiles virgines, et fatalium sacrorum ministri excluduntur praediis haereditate quaesitis? Quid iuvat saluti publicae castum corpus dicare, et imperii aeternitatem coelestibus fulcire praesidiis, armis vestris, aquilis vestris amicas applicare virtutes, pro omnibus efficacia vota suscipere, et ius cum omnibus non habere? Itaque melior est servitus, quae hominibus impenditur? Rempublicam laedimus, cui numquam expedit ut ingrata sit. |