| 2 | In Syria nativitas S. Victoris et Coronae sub Antonino imperatore, duce Alexandriae Sebastiano. Erat autem Victor miles a Cilicia. Cui Sebastianus in confessione fidei digitos confringi et evelli iussit a cute, deinde illum in caminum ignis mitti, ubi triduo permanens non est laesus. Deinde venenum bibere iussus non est mortuus, sed veneficum potius ad fidem convertit. Deinde iussum est nervos corporis eius tolli, deinde oleum bulliens in pudendis eius mitti. Post haec lampades ardentes suspenso ad latera applicari. Post haec acetum et calcem simul misceri, et in os eius infundi. Deinde oculos eius erui. Deinde per triduum capite deorsum verso suspendi. Et cum adhuc spiraret, praecepit eum iudex iniquitatis excoriari. Tunc Corona cum esset uxor militis cuiusdam, coepit beatificare sanctum Victorem pro gloria martyrii, et dum hoc csg456.146 faceret, vidit duas coronas de coelo lapsas, unam Victori et alteram sibi missam. Cumque hoc cunctis audientibus protestaretur, tenta est a duce. Iussumque est duas arbores palmae curvari adinvicem, et cannabineis funibus ligari Coronam in utraque manibus et pedibus, et sic arbores dimitti. Quod dum fieret divisa est Corona in duas partes. Erat autem annorum sedecim. Tunc quoque Victor decollatus, et in omnibus victor effectus, simul cum Corona coronam vitae perennis et martyrii palmam accepit. |