De littera T SHOW APPARATUS
552 | Inter Terram, et tellurem, et humum. Terra squalida est et inculta, tellus fructifera; humus autem, inferior, et deorsum, et humida. Unde et humati, sepulti. Generaliter autem ubique terra est, non ubique humus. Et in parietibus terra est, hoc est in lateribus, et non est humus. Humus autem terra humida est, et ab humore vocata, sicut et terra, quod naturali siccitate torreat, sicut et tellus. quod fructus eius tollimus. |
553 | Inter Temperantiam et temperationem sic discernitur, ut temperantia animorum sit, temperatio rerum. |
554 | Inter Timentem et timidum. Timidus est qui semper timet, timens vero qui ad tempus formidat ex causa. Tali intellectu distinguuntur pavidus et pavens, providus et providens, superbus et superbiens, languidus et languens, furibundus et furens, et caetera similia. |
555 | Inter Tremulum et trementem. Tremulus est natura, tremens tempore. |
556 | Inter Temeritatem et audaciam. Temeritas sine consilio dicitur; audacia, post consilium. |
557 | Inter Tum et tunc. Tum temporis est futuri; tunc, praeteriti. |
558 | Inter Tribuere et attribuere. Tribuimus cum aliquid donamus, attribuimus, dum ordines officiaque distribuimus. |
559 | Inter Tulit, Aabstulit, et sustulit. Tulit qui fert, abstulit qui ab alio tulit, sustulit qui sursum tulit. |
560 | Inter Tumidum et turgidum. Tumet corpus aegroti. Turget cadaver. |
561 | Inter Testor, contestor, et obtestor. Testor saepenumero ad iusiurandum pertinet, ut Virgilius, per sidera testor; contestor autem ad iudices, obtestor ad adversarios. |
562 | Inter Terga et tergora. Terga sunt hominis, quod singulariter tergum facit; tergus vero quadrupedum est. Unde pluraliter tergora coria dicuntur. |
563 | Inter Tumultum et bellum. Bellum est contra hostes exortum, tumultus vero domestica appellatione concitatus. Hic et seditio nuncupatur. Nam seditio est discessio civium. Quod enim seorsum alii ad alios eunt, seditio dicitur. Alii putant propter dissensionem animorum seditionem vocari, quam Graeci diastasin vocant. |
564 | Inter Turbidum et turbulentum. Turbidum de natura est, turbulentum fit. |
565 | Inter Terrenum, terrestre, et terrosum. Terrenum opus dicimus, terrestre, ut maritimum, terrosum vero frumenti genus arenosum. |
566 | Inter Tuus et tus. Tuus pronomen est, tus vero pigmentum. Inter Tuum et tum. Tum adverbium est, tuum pronomen. |
567 | Inter Tempore et tempori. Tempore, ablativo casu, tempori adverbium est. |
568 | Inter Tristitiam, et moestitiam. Moestitia cordis est, tristitia vultus. Moestum ergo vel moerentem animo dicimus, tristem aspectu. Item moestitia temporis est, et fit aliquando ex aliquo accidenti dolore. Tristitia vero, vitium naturae perpetuum est. |