monumenta.ch > Hieronymus > sectio 11 > sectio 3 > sectio 7 > 12
Plinius Minor, Epistulae, 9, Epistula XI <<<     >>> Epistula XIII

Epistula XII SHOW LINKS TO MANUSCRIPTS

s. C. Plinius Iuniori suo s.

1  Castigabat quidam filium suum quod paulo sumptuosius equos et canes emeret. Huic ego iuvene digresso: 'Heus tu, numquamne fecisti, quod a patre corripi posset? 'Fecisti' dico. Non interdum facis quod filius tuus, si repente pater ille tu filius, pari gravitate reprehendat? Non omnes homines aliquo errore ducuntur? Non hic in illo sibi, in hoc alius indulget?' 2  Haec tibi admonitus immodicae severitatis exemplo, pro amore mutuo scripsi, ne quando tu quoque filium tuum acerbius duriusque tractares. Cogita et illum puerum esse et te fuisse, atque ita hoc quod es pater utere, ut memineris et hominem esse te et hominis patrem. Vale.