monumenta.ch > Plinius Minor > 15
Plinius Minor, Epistulae, 9, Epistula XIV <<<     >>> Epistula XVI

Epistula XV SHOW LINKS TO MANUSCRIPTS

s. C. Plinius Falconi suo s.

1  Refugeram in Tuscos, ut omnia ad arbitrium meum facerem. At hoc ne in Tuscis quidem: tam multis undique rusticorum libellis et tam querulis inquietor, quos aliquanto magis invitus quam meos lego; nam et meos invitus. 2  Retracto enim actiunculas quasdam, quod post intercapedinem temporis et frigidum et acerbum est. Rationes quasi absente me negleguntur. 3  Interdum tamen equum conscendo et patrem familiae hactenus ago, quod aliquam partem praediorum, sed pro gestatione percurro. Tu consuetudinem serva, nobisque sic rusticis urbana acta perscribe. Vale.