Augustinus, Epistolae, DE PRAESENTIA DEI LIBER, SEU..., 12, 36.
| 1 | Nec movere nos debet, quod per quosdam ad hoc templum non pertinentes, vel nondum pertinentes id est in quibus non habitat, vel nondum habitat Deus, aliquid virtutis operatur; sicut per illum qui in nomine Christi expellebat daemonia, cum Christum non sequeretur, quem permitti iussit propter multis utilem commendationem nominis sui (Marc. IX, 37-39). |
| 2 | Multos quoque ait sibi in novissima die dicturos, In nomine tuo virtutes multas fecimus: quibus utique non responderet, Non vos novi (Matth. VII, 22, 23), si ad templum Dei, quod inhabitando beatificat, pertinerent. |
| 3 | Cornelius etiam centurio antequam regeneratione incorporaretur huic templo, missum ad se angelum vidit, audiitque dicentem quod exauditae sint orationes eius, et eleemosynae acceptae (Act. X, 4). |
| 4 | Agit enim haec Deus tanquam ubique praesens, vel per sanctos Angelos suos. |