Beda Venerabilis, De arte metrica Ed.2, 1, XX. de metro iambico exametro
| 1 | metrum iambicum senarium recipit iambum locis omnibus, tribrachin locis omnibus praeter nouissimum, spondeum, dactylum, et anapestum locis tantum inparibus, pyrrichium loco tantum ultimo. |
| 2 | quo nobilissimus Hispaniarum scolasticus, Aurelius Prudens Clemens, scripsit proemium psychomachiae, id est, libri quem de uirtutum uitiorumque pugna heroico carmine conposuit. |
| 3 | ita enim inchoat: senex fidelis, prima credendi uia Abram, beati seminis serus pater, adiecta cuius nomen auxit syllaba, Abram parenti dictus, Abraham deo. |