| 1 | Romae natale Papiae et Mauri, militum, tempore Diocletiani, qui videntes constantiam Saturnini et Sisinii martyrum, conversi sunt ad fidem, statimque iussum est a Laodicio urbis praefecto, ut os eorum, qui Christum confitebantur, cum lapidibus contunderentur, et retruderentur in carcerem, ubi baptizati sunt a beato papa Marcello, quos post dies duodecim eductos iussit sterni in terram, et fustibus caedi; deinde levatos de terra plumbatis caedi, donec exspirarent. Quorum corpora colligens nocte Ioannes presbyter, sepelivit via Numentana ad nymphas beati Petri, ubi baptizabat. Scriptum est in gestis beati papae Marcelli: Treveris depositio beati Valerii episcopi, discipuli sancti Petri apostoli. |